Третоодделенци од ООУ „Лазо Трповски“ од Скопје освоија награда на Меѓународниот училиштен натпревар за воздушен и вселенски сообраќај 2015 во Берлин, Германија. Проектот изготвен од учениците од 3а одделение „Заедно летаме во вселената“ беше координиран од училиштен тим составен од тројца наставници во својство на ментори: Дијана Петроска, Александра Гаџоска и Стефан Симовски. Имено, третоодделенците се пласираа помеѓу 30 најдобри проекти на натпреварот и за својот пласман добија соодветни дипломи и соодветен подарок (автентичен модел на патнички авион Ербас А-380 во размер 1:200).

Натпреварот го организира Сојузното германско здружение за воздушна и вселенска индустрија од Берлин во соработка со Сојузното министерство за економија и енергија на Германија, Сојузното министерство за образование и истражување на Германија, Луфтханза Техник АД и концернот ЕАДС (во чиј склоп влегува и познатиот производител на патнички авиони Ербас). Конечната одлука во врска со наградите на овој екипен меѓународен натпревар за ученици од трето и четврто одделение ја донесе деветчлено стручно жири. Подетални информации во врска со натпреварот може да најдете на официјалната веб-страница на организаторот на натпреварот www.skyfuture.de
Во името на деветчленото стручно жири на наградените третоодделенци од ООУ „Лазо Трповски“ им се обрати раководителот на натпреварот Тим Е. Бранд кој меѓу другото истакна:

„Ви благодарам за прекрасниот проект. Не е важно што не сте на пиедесталот зашто и вие сте меѓу наградените на натпреварот. Да така е, радувајте се, затоа што и вие освоивте награда! Наградени сте затоа што вашиот проект е фантастичен, затоа што се забавувавте додека го работевте и затоа што сте одлични тимски играчи. Се разбира сите финалисти на натпреварот освојуваат награда! Вашата награда е летачки трофеј за целото одделение и диплома за секого од вас. Се надевам дека учеството на натпреварот ви беше толку забавно како што му беше и на жирито кога го оценуваше вашиот проект“.

Учеството на овој меѓународен натпревар ООУ „Лазо Трповски“ од Скопје го реализираше како воннаставна активност.

Стефан Симовски